Јане Ченто, еден од обвинетите за насилствата во Собранието од 27 април, минатата година, утрово бил приведен од својот дом во Прилеп, каде издржуваше мерка притвор и префрлен во истражниот затвор „Скопје“, во Шуто Оризари.
Од Кривичниот суд во Скопје за НОВА потврдија дека на Ченто му е заменета мерката куќен со затворски притвор и е префрлен во Шутка.
Оттаму информираат дека Кривичниот совет на Основниот суд Скопје 1 добил известување од МВР дека осомничениот не се придржувал до мерката куќен притвор и затоа е сменето решението од куќен притвор во притвор.
Инаку, Ченто еднаш веќе беше во истражниот затвор во Шутка, но по одлука на Апелацискиот суд мерката му беше заменета со куќен притвор и му беше одземен пасошот.
Според обвинението што Обвинителството за гонење на организиран криминал и корупција минатата недела го поднесе во судот, Ченто на 27 април, лани добил повик од Александар Василевски – Нинџа и заедно со осомничените Игор Југ, Младен Додевски, Захарие Симовски, Михаил Младеновски и Дејан Давидовски го мобилизирале членството за упад во Собранието.
Јане Ченто инаку е претседател на патриотското здружение „Пере Тошев“ од Прилеп.
Кривичниот суд минатата недела, по поднесувањето на обвинението за 27 април, во притвор во Шутка ги врати, екс министерот за внатрешни работи и директор на Бирото за јавна безбедност, Митко Чавков, Горан Ѓошевски, од обезбедувањето на поранешниот спикер Трајко Вељановски, Душко Лазаров, Оливер Поповски и Митко Пешов од МВР.
Објаснувањето на судот за враќањето на Чавков во притвор беше дека полициска екипа на 27 ми март извршила две контроли во неговиот дом каде тој според решението на Врховниот суд требало да ја издржува мерката куќен притвор, но не го нашле таму. Ова Кривичниот суд го зел во предвид кога одлучувал по барањето на обвинителството за одредување на мерката притвор на Чавков по поднесеното обвинение истиот ден.
Следниот ден во Шутка беше спроведен и Никола Митревски – Кољо, исто така обвинетите за насилствата во Собранието на 27 април, откако сам се пријави во полициската станица „Кисела Вода“, по неколкумесечно бегство.