Во пресрет на презентацијата на проектот „Заедно за одговорност: Поддршка на СЈО во зајакнувањето на неговите оперативни капацитети и капацитетите за меѓународна правна соработка“, обвинителката Катица Јанева, рече дека тие истражуваат криминал во повеќе европски земји.
„Се надевам дека ќе откриеме каде се одлеани парите и дали се во Македонија“, рече Јанева, посочувајќи дека истражуваат финансиски криминал во Чешка, Грција, Велика Британија и Холандија.
Јанева дополни и дека СЈО веќе подолго време презема активности за проектот „Скопје 2014“.
„Не би сакала да прејудицирам, но се надевам дека наскоро ќе излеземе со јавнообвинителска одлука“, рече првата жена на ова обвинителство.
Исто така, таа додаде дека СЈО е претпазливо во насока да не застарат предметите што ги водат.
Обвинителството на Јанева денеска промовира проект кој треба да ги зајакне капацитетите за финансиски истраги. Проектот ќе трае пет години, а добиен е од холандското Министерство за надворешни работи.