Согласно Законот за Специјално јавно обвинителство, специјалната обвинителка Катица Јанева неделава треба да го поднесе вториот извештај за работата на СЈО.
СЈО е обврзано на секои шест месеци да даде отчет до Собранието и Советот на јавните обвинители за активностите, финансиите, кадровската екипираност, вклучително и напредокот во истрагите.
Извештајот треба да биде поднесен на 15 септември, што се поклопува со годинишнината од формирањето на ова Обвинителство.
„Јавниот обвинител ќе поднесува извештај секои шест месеци за неговите, односно нејзините активности, вклучувајќи и опис за напредок во која било истрага или гонење преземено од јавниот обвинител. Во таквиот извештај може да бидат изоставени материјали кои според јавниот обвинител треба да се чуваат како доверливи, но ќе обезбеди соодвети информации за да ги оправда трошоците“, стои во ставот 2 од членот 7 на Законот за СЈО.
Првиот извештај од формирањето на СЈО, Јанева го испрати на 15. март. Тоа предизвика бура од реакции во Советот на јавни обвинители, но и во Комисијата за политички систем и односи меѓу заедниците во Собранието, каде претставниците од власта бараа Јанева лично да го образложи Извештајот.
Нејзиното отсуство предизвика жестока расправа меѓу власта и опозицијата. Тогаш Јанева посочи дека согласно Законот, таа не е обврзана лично да го презентира сработеното, по што ги повика сите кои имаат некакви прашања да се обратат дирекно во Специјалното обвинителство.
Првиот Извештај на Јанева може да го прочитате тука.