Специјалната јавна обвинителка, Катица Јанева денеска го објави петтиот шестмесечен извештај за работата на СЈО, кој се однесува на периодот од 15 септември 2017 до денеска, односно 15 март 2018 година.
Во извештајот како еден од проблемите што ги нотира Јанева е доцнењето со донесувањето на Законите за укажувачите и за заштита на сведоци.
„…Потребно е да истакнам дека и покрај фактот што во четвртиот извештај беше констатиран напредок од аспект на превземените напори за вклучување на ова јавно обвинителство во работата на работните групи формирани од страна на Министерството за правда задолжени за подготовка на Предлог текстови на законите во насока на имплементирање на препораките на Венецијанската комисија и тоа во Законот за заштита на укажувачи и Законот за заштита на приватноста, како и донесување на измените на Законот за заштита на сведоци, и покрај нашиот активен придонес и учество, од страна на Собранието на Република Македонија наведените законски решенија сеуште не се донесени“, се наведува во извештајот на Јанева.
Јанева, меѓудругото информира дека во овој шестемесечен период СЈО ја презело надлежноста за предистражните предмети од Основното јавно обвинителство Скопје и од Основното јавно обвинителство за гонење на организиран криминал и корупција Скопје за случаите „Скопје 2014“, за „Актор“, случајот за објектот „Космос“, за Пописот на населението во 2011 година.
„Во текот на извештајниот период заведени се 136 нови предистражни предмети. Од нив 23 предмети се формирани по сопствена иницијатива, а 113 предмети се формирани врз основа на пријави од други подносители. Вклучувајќи ги претходно отворените 99 активни предистражни постапки во ова Јавно обвинителство во моментот се во работа вкупно 235 предистражни постапки“, стои во извештајот.
Во него Јанева информира и дека СЈО досега успеало да ја анализира содржината на 85 отсто од вкупно 606.555 аудио-фајлови со кои располага ова обвинителство. Притоа се изработени 1.784 транскрипти каде што врз основа на преслушаните разговори постои индикација за сторено кривично дело.
„Ова Јавно обвинителство исто така е во процес на анализирање на повеќе од 100.000 аудио фајлови кои се прибавени при спроведени претреси кај неколку лица и во тек е утврдување дали и во колкав број овие аудио фајлови претставуваат предмет на незаконското следење на комуникациите“, стои во извештајот.
Како резултат на поднесените и прифатени обвиненија, од кои за најголем дел се водат судски процеси, Јанева во извештајот ги наведува и 11-те судски пресуди против обвинети во четири случаи, односно во Таргет/Тврдина, за насилствата во општина центар, Тврдина 2 и во случајот Тифани.