Дојде по нова работа во Скопје пред два, експресно ја договори и со два одржани тренинга го предводеше Вардар до победа што може да биде пресудна за испишување на фудбалска историја. Чедомир Јаневски изрази задововолство од играта и резултатот против Фенербахче, упати пофалби до играчите, но истовремено и амортизира со цел да нема губење на тло под нозе, кревање во облаци и прокоцкување на шансата што се укажува на „црвено-црните“. Имаат одлични 2:0 против големиот ривал од Истанбул пред реваншот на „Шукру Сакачоглу“ наредниот четврток и ќе мора да останат приземни за заверка на отпочнатото на „Телеком арена“.
„Убав резултат, убава победа. Фудбалерите одиграа со срце, а навивачите направија атмосфера и нè поддржаа што многу нѝ значеше. Притоа треба да бидеме реални и признаеме дека постигнавме голови по грешки на противникот. Среќата ни заврте грб против Копенхаген, но овојпат беше со нас“, коментира Јаневски по воведните 90 минути од двомечот со Фенербахче.
Новиот вардаров менаџер предупредува на потребата од ладни глави и дека нема место за еуфорија. Зад екипата се само 90 минути и има уште толку до посакуваната цел – пласман на македонски претставник во групите во Лига Европа или во Лигата на шампиони што е сон од осамостојувањето. Тоа е можно само со работа, мисла и пристап дека ништо не е завршено и дека Вардар не е дел од групите во второто по ранг натпреварување на УЕФА. Македонскиот првак засега доби битка, за добивање и на фудбалската „војна“ со Фенербахче ќе биде потребна борба и одолевање и во Истанбул по седум дена.
„Ќе мора да мислиме како до гол и таму. Ако успееме да постигнеме еден, не верувам дека ќе примиме четири. Таму ќе наидеме на фудбалски одлична атмосфера, таму ќе наидеме на „пекол“ што ќе мор да се издржи. Имам верба во фудбалерите дека ќе успеат да се справат со предизвикот, имаат искуство за играње на такви мечеви и не се сомневам дека ќе дадат максимум за минување на оваа пречка и да се биде дел од групната фаза што сите ја посакуваме“, заклучи поранешниот селектор на Македонија на клупата на Вардар.
До реваншот со Фенербахче, вардарци ќе имаат обврска и во домашното првенство. Во недела ги очекува меч со Победа на домашен терен во рамки на второто коло од новата сезона, па потоа Фенербахче ќе се врати во агендата на Чедомир Јаневски и на „црвено-црните“.