На крузерот „Дајмонд принцес“, кој е закотвен во близина на градот Јокохама, се регистрирани нови 44 случаи на корона-вирус, соопшти јапонското Министерство за здравство. Со тоа бројот на заболени на бродот, на кој во карантин се наоѓаат околу од 3.700 патници и членови на екипажот, се зголеми на 218 лица од 713 лица колку што досега се вкупно тестирани.

Јапонските власти соопштија дека ќе дозволат на дел од повозрасните патници, кои биле негативни на тестот за коронавирус, да го напуштат бродот пред истекот на карантинот на 19 февруари. Министерот за здравство Кацунобу Като, истакна дека тие ќе заминат од бродот уште утре, а останатото време за карантин ќе го продолжат на копно.

Според јапонските медиуми, околу 80 отсто од патниците се над 60-годишна возраст, 215 се на 80-годишна возраст, а 11 лица имаат по 90 години.