Првобитната замисла за изработка на медалите за олимписките игри во Токио во 2020 година ќе биде остварена. На иновативноста на Јапонците нема крај, па одличјата за најдобрите спортисти ќе бидат направени од стари мобилни телефони. За таа цел, организаторите на настанот очекуваат до крајот на март да успеат да соберат доволно застарени електронски уреди (мобилни телефони, дигитални фотоапарати и лаптопи) за 5.000 медали за олимписките и параолимписките Игри наредното лето.
За 5.000 медали, како што стои во соопштението на организаторите на ОИ 2020, потребно е да се извадат два тона злато, сребро и бронза. Колку за споредба, за одличјата за ОИ 2012 во Лондон се потрошија 9,6 килограми злато, 710 килограми сребро и 1,3 тони бронза. Проценките се дека во Јапонија годишно се фрла околу 650.000 тони електронски уреди, а нешто над 100.000 парчиња се враќаат во употреба. Јапонците се познати по тоа што користат стари електронски уреди за да направат нови.