Каков вкус има љубовта? Одговорот најверојатно зависи од тоа кого прашувате.
Од некои луѓе може да добиете одговор дека вкусот е горчлив, како темно чоколадо. Други, пак, може да го опишат чувството како вкусно декадентно, како слатко колаче.
Па, еден синџир на пекари во Јапонија користи технологија за да ги дознае одговорите.
Најстарата пекара во земјата, Кимураја, ги здружи силите со јапонската компанија за електроника НЕК Корп за да го произведе она што го нарекува „Рен АИ Пан“ – што во превод значи „Романтичен леб создаден со вештачка интелигенција“.
НЕК и Кимураја тврдат дека новата понуда, која доаѓа во пет вкусови, ја доловува суштината на чувствата што многумина од нас ги поврзуваат со љубовта.
Според соопштението објавено од двете компании, НЕК ја користела својата технологија за вештачка интелигенција за да ги анализира разговорите од реалити ТВ-шоуа за љубовни состаноци, како и песните кои во своите текстови ги содржат зборовите од типот на слатки и овошје.
Преку оваа анализа, тие успеале да идентификуваат пет клучни романтични чувства: прва средба, прв состанок, љубомора, скршено срце и взаемна љубов. Тогаш, наводно, пекарата ги трансформирала овие чувства во различни вкусови на воздушест леб на пареа.
Дали би сакале да лапнете едно парче?
Лебот е пуштен во продажба од 1 февруари во супермаркетите во областа Канто во Јапонија и е достапен на онлајн продавницата на Кимураја.
Како да го пронајдете вкусот на љубовта
Што се однесува до тоа што доведе до овој необичен пар, се чини дека и двата бренда се соочувале со сличен предизвик, поточно, како да ја зголемат својата привлечност кај помладите генерации Јапонци.
Преку истражување на пазарот, Кимураја открила се поголем број млади кои велат дека не се заинтересирани за романтични врски. И покрај ваквиот тренд, кај младите сè уште постоела силна желба да одат на состанок, да се заљубат и да завршат со партнер.
Препознавајќи ја оваа празнина, компанијата одлучи да создаде леб кој ги рекреира вкусовите на романтиката за да евоцира чувства на заљубеност – всушност, инспирирајќи ги да внесат некои од тие сензации во нивниот личен живот.
НЕК вели дека користела две технологии за вештачка интелигенција за проектот: „NEC Enhanced Speech“ за конвертирање на говор во текст и „NEC Data Enrichment“ за генерирање резултати на емоции од текстуални податоци.
Користејќи ги овие информации, вештачката интелигенција избрала состојки што ги претставуваат емоциите поврзани со љубовта.
За да добијат материјал за работа, компанијата спровела „анализа на разговор“ користејќи 15 часовна снимка од јапонско реалити ТВ-шоу за љубовни состаноци наречено „Денес се заљубив“.
Оттаму, вештачката интелигенција ги претворила разговорите во текст, ставајќи ги секој во една од петте категории: судбоносна средба, состанок, љубомора, скршено срце или взаемна љубов.
Следно, вештачката интелигенција извлекла стихови од приближно 35.000 песни поврзани со љубовта и храната од јапонската база на податоци. Потоа, вештачката интелигенција беше искористена за доделување „емоционални резултати“ на разговорите и стиховите за да се создаде визуелна мапа што одговара на различните фази на љубовта со одредена храна и вкусови.
Лебот „Судбоносна средба“ има вкус на шеќерна волна, која ја претставува слатката, воздушеста емоција на првите љубовни скокоткања. „Љубомората“ има вкус на виолетови слатки компири, масло од тартуфи и суво грозје.
Заокружувајќи ги другите лебови, „Првиот состанок“ има вкус на цитрус, лимета и кора од портокал, а „Взаемна љубов“ е слатка мешавина од мед, праска и питаја.
Иако овие концепти за леб беа создадени благодарение на технологијата, сè уште имаше потреба од човечко учество.
„Изборот на состојките го направи вештачката интелигенција, но нашата улога беше да го направиме лебот“, рече Јуки Китазава, програмер во пекарата Кимураја. „Посветивме внимание на боите што се користат за визуелно изразување на романтични емоции и се стремиме кон живописен и поп изглед на нашиот романтичен леб.
Извор: Си-Ен-Ен
Превод: Марта Пешевска