Јовески ќе ги преземе предметите кои ќе му ги дадат од СЈО, соопштија од Јавното обвинителство. Одлуката била донесена на стручен колегиум на јавните обвинители на кој било разгледано писмото од Катица Јанева, но и од обвинителите од СЈО.
„Јавното обвинителство го разгледа Известувањето испратено од Јавниот обвинител за гонење на кривични дела поврзани и кои произлегуваат од содржината на незаконското следење на комуникациите доставено преку судија на претходна постапка од Основниот кривичен суд Скопје и Известувањето од јавни обвинители на тоа обвинителство, при што зазеде став да ги преземе во надлежност и натамошно постапување предметите кои ќе му бидат предадени од Јавното обвинителство за гонење на кривични дела поврзани и кои произлегуваат од содржината на незаконското следење на комуникациите“, соопштија од Јавното обвинителство.
Предметите ќе бидат предадени да продолжат во надлежните јавни обвинителства.
Од државното обвинителство појаснуваат дека ваквиот став е заснован на уставната положба на Јавното обвинителство како единствен државен орган надлежен за гонење на сторителите на кривичните дела и на други казниви дела.
Обвинителството се повикува на начелото на легалитет на кривичното гонење, според кое јавниот обвинител е должен да преземе кривично гонење, ако постојат докази дека е сторено кривично дело за кое се гони по службена должност, како и обврската во име на општеството да се грижи за ефикасноста на кривично – правниот систем, почитувајќи го принципот на правна сигурност на граѓаните како темелна вредност на владеењето на правото.
Специјалната јавна обвинителка Катица Јанева која е во притвор, од затворот во Шутка достави барање до Јавното обвинителство да ги презеде сите истраги и предмети на СЈО, дури и судските предмети кои се пред пресуда.
Професорот Гордан Калајџиев, кој присуствуваше на консултациите во Министерството за правда, каде беа и Јовески и обвинителката од СЈО ленче Ристовска, смета дека Јанева нема право од притвор да делегира предмети на Јавниот обвинител кои ги добила законски и да ги трансферира кај Јовески.
„Законот за СЈО не предвидува сите предмети да преминат во Јавното обвинителство. Таа можност во Законот за СЈО важи само за предметите кои СЈО нема да ги заврши, со оглед на ограничените ресурси и време на дејствување, а во никој случај не важи за сите предмети“, рече Калајџиев пред консултациите во Министерството за правда за новиот Закон за јавно обвинителство.
Калајџиев: СДСМ и ВМРО ДПМНЕ треба да кажат зошто не договорија наследник на Јанева
Камбовски: СЈО ја одигра својата улога, предметите сега треба да преминат во Обвинителството