Малку недостасуваше за Каролина Плишкова да направи „од готово – вересија“, а Ју-Ес опен да остане без првата носителка по мечевите од третото коло. Чешката тенисерка спаси меч топка во вториот сет, имаше 0:2 во решавачкиот и спасуваше брејк за 0:3, но успеа да се извлече од непријатната ситуација на „Артур Еш“ и на крајот да слави пласман во осминафинале на гренслемот во Њујорк по триумфот против кинеската ветеранка, Шуаи Жанг со 3:6, 7:5, 6:4.
„Не дозволив да ме фати паника, но да бидам искрена не бев ниту смирена“, рече Плишкова за пресвртот и освојување на вториот сет, за надминување на кризата во третиот и за трасирање на патот до дуел со подобрата од мечот меѓу Брејди и Никулеску.
Статистиката од натпреварот покажува на, речиси, израмнет сооднос на Плишкова и Жанг. Двете забележаа по 33 директни поени, првиот женски рекет на Чешка направи 38 неизнудени грешки, Кинеската ги имаше осум повеќе, а вкупниот резултат во поени гласеше 108:106 во полза на прворангираната тенисерка на американскиот гренслем.
Дел од Ју-Ес опен во втората натпреварувачка недела и за Аргентинецот Хуан Мартин дел Потро. Шампионот од 2009 година се проби до осминафинале по победата над 12 носител, Роберто Баутиста Агут од Шпанија со 6:3, 6:3, 6:4 за што му требаа нешто повеќе од два часа игра.
Дел Потро, кој сè уште е без загубен сет по дуелите со Лаксонен, Менендеш Масеираш и Баутиста Агут, во наредното коло ќе игра со Австриецот Доминик Тим.
Ју-Ес опен – натпреварувачки ден 6
Жени, 3 коло
Ka. Плишкова (1., Чешка) – Жанг (27., Кина) 3:6, 7:5, 6:4
Касаткина (Русија) – Остапенко (12., Летонија) 6:3, 6:2
Сафарова (Чешка) – Нара (Јапонија) 6:3, 6:2
Канепи (Естонија) – Осака (Јапонија) 6:3, 2:6, 7:5
Мажи, 3 коло
Тим (6., Австрија) – Манарино (30., Франција) 7:5, 6:3, 6:4
Дел Потро (24., Аргентина) – Баутиста Агит (12., Шпанија) 6:3, 6:3, 6:4
Колшрајбер (33., Германија) – Милман (Австралија) 7:5, 6:2, 6:4
Долгополов (Украина) – Троицки (Србија) 6:1, 6:0, 6:4