Претседателот на Европската комисија, Жан Клод Јункер, в недела доаѓа во официјална посета на Македонија, во придружба на комесарот за проширување Јоханес Хан.
Засега се потврдени средби со премиерот Зоран Заев и со претседателот Ѓорѓе Иванов, но не се исклучуваат и дополнителни.
Јункер и Заев треба да одржат и заедничка прес конференција, потврдуваат од Европската Комисија.
Во Европската Комисија одбиваат засега да влегуваат во детали околу пораките кои ќе им бидат пренесени на македонските претставници, особено во однос на решавањето на спорот за името.
Од македонската Влада пак, оценуваат дека „ова е важен момент за презентација на Стратегијата, но и за охрабрување на владите да ги удвојат напорите за постигнување на новите скратени цели“.
Како што во повеќе наврати изјави вицепремиерот за евроинтеграции Бујар Османи, Стратегијата е добра за Македонија, бидејќи се валоризираат успесите на земјата во однос на реформите.
Тој очекува дека Извештајот на Европската комисија за напредокот на земјата, кој ќе биде соопштен на 17 април, треба да донесе деветта по ред препорака за отпочнување преговори.
Која е пораката
Јункер посетата ја најави при презентирањето на самата стратегија на 6 февруари, чиј наслов е “Западниот Балкан е интегрален дел од Европа”.
Но, целта на стратегијата е Западниот Балкан да стане интегрален дел од Европската унија (ЕУ). А до таму патот е долг послан со многу работа.
Ова е дел од пораката што во Македонија ќе ја донесе првиот човек на ЕК Жан-Клод Јункер за време на неговата посета.
Јункер ќе ги посети сите балкански земји за да им ја претстави лично стратегијата што ја иницираше токму тој во септември 2017 година кога изјави дека ЕУ треба да даде креидибилна перспектива за членство на Балканот во ЕУ. Нешто подоцна, во ноември, тој додаде дека, според него, Србија и Црна Гора ќе станат членки на ЕУ пред 2025 година.
“Сакам да го повторам моето убедување дека е неопходно да ја задржиме отворена ЕУ перспективата за Западен Балкан. Во овој момент по се изгледа не е можно да примиме нови членки во 2019 година (з.н. во 2019 година завршува мандатот на Јункер), но сакам на европската перспектива да не се гледа како покана, туку како континуирана потреба за овој дел на Европа”, порача Јункер.
Без национален консензус со срце и ум нема влез во ЕУ
Прво, Комисијата бара сериозно зајакнување на правните држави на Балканот и вистинска борба против корупцијата бидејќи секаде на Балканот владее чувство дека некои луѓе не можат да бидат казнети. А медиумите во многу земји се под контрола на власта.
Второ, економиите на балканските земји не се компетитивни и економијата е исто така под контрола на власта. На ова исто така треба да му се стави крај за да можат земјите да напредуваат кон ЕУ и за да можат да отвораат работни места особено за младите.
Трето, тука се билатералните проблеми мораат да се решат. Комисијата подвлекува дека ЕУ «нема да ги вовезува овие кавги» па трајни решенија мора да бидат најдени «пред земјата да влезе во ЕУ».
Четврто, и исто толку важно како и претходните три точки, е фамозниот консензус на државата за влез во ЕУ: политички и општествен консензус со кој граѓаните ќе ја дадат својата “поддршката и со срце и со ум”, вели стратегијата.
Накусо, пораката на Комисијата на Јункер е – ако сакате во ЕУ, акцијата треба да започне веднаш.
Мандатот на Јункер на чело на ЕК завршува во 2019 година