Според претседателот на Европската Комисија, Жан-Клод Јункер, Турција со џиновски чекори се оддалечува од Европа а вината за тоа се обидува да ја префрли на Европската унија.
„Турција се оддалечува од Европа со џиновски чекори. Таа не може да издржи жештина во европската кујна и како резултат на тоа се обидува да ја префрли вината на ЕУ за пропаѓање на преговорите. Јас би сакал тоа да го спречам. Мнозинство од цивилното општество во Турција е настроено кон Европа. Би требало да ги поддржиме, а не да ги разочаруваме“, изјави Јункер за „Билд“.
Тој го поддржува предизборниот предлог на канцеларката на Германија, Ангела Меркел да се прекинат преговорите со Анкара, а влошените односи меѓу ЕУ и Турција смета дека се резултат на турскиот претседател, Реџеп Тајип Ердоган.
Ердоган во неделата, при обраќањето пред турските пратеници, рече дека тие нема да ги напуштат преговорите со ЕУ кои се во застој, но дека реално, на Турција повеќе не и било потребно членството во ЕУ.
Воедно Јункер порача дека нема ништо против Меркел да ја преземе неговата функција по истекот на мандатот во 2019 година, но лично смета дека таа нема такви планови.