Револт од судиите по натпреварот со Шпанија беше присутен и кај Кире Лазаров. Иако вели дека не коментира одлуки на арбитри низ кариерата, сепак, не можеше да се воздржи по четвртиот настап во Мец.
„Машки излеговме на терен, машки одигравме. Иако сме репрезентација од вториот ешалон, ние дадовме максимум. Не се штедевме ниту калкулиравме, но не добивме рамномерно судење. Значиме многу во ИХФ и во ЕХФ меѓутоа на таков третман немаме од судиите. Во едно сум сигурен. Господ ќе нè награди кога ќе биде најпотребно“, беше коментарот на Лазаров, стрелец на шест гола против „фуријата“ на Рибера за која е убеден дека ќе стигне до медал на шампионатот.
Македонската репрезентација попладнево ќе игра и со Исланд од 17,45 часот во последното коло од групната фаза. Играта против Шпанците е основа во вербата за добра игра, за позитивен резултат и закажување на осминафинална средба со Норвешка наместо со Франција.
„Тоа е што е. Време за плачење нема. Времето е кратко, нè чека нов натпревар. Физички мислам дека не сме потрошени многу. Добро стоиме и на психолошки план, а против Шпанија покажавме и карактер. Да продолжиме во ист ритам и против Исланд и да стигнеме до посакуваното трето место во групата“, додаде Лазаров кој по надминување на границата од 1.000 гола за Македонија на Европски првенства, на Светски првенства и во квалификациски натпревар, против Шпанците се промовира и во „мистер цепелин“.