Бизнисменот Сеад Кочан којшто е осомничен во случајот „Труст“ на Специјалното јавно обвинителство се уште не е притворен ниту пак надлежните располагаат со информации за неговата локација, откако Кривичниот совет вчера попладне ја прифати жалбата на СЈО и нареди притворање на Кочан.
Адвокатот Никола Додевски, кој го застапува Сеад Кочан, денеска изјави дека одбраната и обвинетите немаат добиено никакво решение за притвор и додека тоа не се случи тој е слободен човек.
Додевски е зачуден како новинарите дознаваат пред обраната дека Кривичниот совет му одредил мерка притвор.
Специјалната обвинителка Катица Јанева рече дека биле известени за притворот на Кочан, но до моментот кога тргнале во суд решение не им било доставено.
Според информации на НОВАТВ, во полицијата за Кочан е распишана интерна потерница, но нема објаснување каде е сопственикот на „Тран Мет“ и колку полицијата е ангажирана во неговото пронаоѓање. Кочан има можност и сам да се јави во полицијата.
Сопственикот на компанијата „Транс Мет“ и телевизијата „НОВА“ живее на улицата „Димче Мирчев“ во блокот згради спроти Министерството за внатрешни работи. Тоа и истиот блок во којшто живее и поранешната министерка Гордана Јанкулоска како и синовите на пратеничката Силвана Бонева и генералниот секретар на владата Кирил Божиновски.
Кривичниот совет на Основниот суд Скопје 1 вчера попладне ја прифати жалбата на СЈО и издаде наредба за приведување на сопственикот на фирмата „Транс Мет“, Сеад Кочан, осомничен за случајот „Труст“.
Покрај Кочан, во овој предмет осомничен е и Василије Авирович, овластен потписник на компанијата „Силекс неметали“, за кого судија на претходна постапка одреди мерки на претпазливост.
Според истрагата на СЈО, обвинетите фалсификувале документи со кои добиле тендер од 17 милиони и 200 илјади евра од ЕЛЕМ за ископ на јаглен и јаловина од рудникот Суводол. Овие три фирми на тендерот настапиле како конзорциум, а главен носител била „Транс мет“.
Прес на СЈО за Труст