Македонската кадетска ракометна селекција го освои 13. место на осмото Светско првенство во Скопје. Во последниот настап на турнирот, „црвено-жолтите“ ја совладаа Аргентина со 29:26 (полувреме: 15:8) и се одмаздија на „гаучосите“ за поразот (20:23) во првото коло во групата Ц.
Кристијан Симоноски овојпат беше најефикасен поединец во составот на Данило Брестовац со девет гола, Михалјо Младеновиќ постигна шест, а по три реализираа Ален Ќосевски, Ненад Костески, Мартин Серафимов и Марко Божиновски.
Македонскиот национален тим одигра седум меча на СП 2019. Од нив славеше во три (против Нигерија 37:34, против Бахреин 27:25 и сега против Аргентина 29:26 во разигрувањето за пласман од 9 до 16 место), а загуби од Аргентина (20:23), од Данска (26:29) и од Јапонија (22:31) во групата Ц и од Португалија (25:29) во осминафиналето.
Деветто место на СП го освои Јапонија која на пенали ја совлада Хрватска со вкупни 36:35 (резултатот во мечот по 60 минути игра беше 30:30). Шведска заврши на 11. место по триумфот во скандинавската пресметка со Норвешка со 30:24, а во натпревар за 15. место, Словенија беше подобра од Тунис со 34:23.
СП 2019 во ракомет (У19) / разигрување за пласман од 9 до 16 место
За 9 место: Хрватска – Јапонија 30:30 / на пенали 5:6
За 11 место: Шведска – Норвешка 30:24
За 13 место: С. Македонија – Аргентина 29:26
За 15 место: Словенија – Тунис 34:23