Пратеникот на СДСМ, Дарко Каевски, вели оти градоначалничката на Град Скопје, Данела Арсовска, освен нивелирани шахти и мобилни тоалети нема реализирано ниту еден конкретен, крупен проект.
„Мостот во Аеродром досега требаше да биде завршен. Обновата на Универзалната сала. Бесплатниот превоз за скопјани. Треба да бидат завршени реконструкциите на 10 тина улици. Поминаа 82 дена од мандатот а наместо решенија и проекти, граѓаните на Скопје од Арсовска видоа само партизација на градската администрација и изземање од одговорност за своите надлежности“, рече Каевски.
Тој вели дека во својот отчет градоначалничката Арсовска заборавила да спомене неколку работи кои го одбележаа нејзиниот досегашен мандат, како прекинувањето на проектот Бас рапид транзит, закочената изградба на двата нови моста, стопираната изградба на Универзалната сала, како и поништениот оглас за вработување на 20 пожарникари.
„Комплетно ги партизираше јавните претпријатија, јавните установи и Град Скопје. Колку е партизирана работата на Град Скопје зборува и тоа што на денешниот отчет наместо државната, на неколку секунди беше пуштена химната на ВМРО-ДПМНЕ. После 82 дена јасно е дека Данела Арсовска е најслабата градоначалничка на Скопје“, рече пратеникот Дарко Каевски.