По 48 часа минати во досега неосвоената тврдина – Управата за безбедност и контраразузнавање, тимот на СЈО успеа да одземе дел од прислушуваните материјали со кои во средата влезе со судски налог.
Веднаш по заминувањето од УБК, Специјалното јавно обвинителство излезе со соопштение.
„Одземени се сите наредби за Посебни истражни мерки за следење на комуникациите и книгите за евиденција како и бараните компјутерски податоци од системот за следење на комуникација. Останува да се изврши дополнително одземање на компјутерските податоци за кои е потребна асистенција од надворешен експерт и очекуваме во наредниот период да се изврши и тој дел од наредбите“.
За останатите податоци кои во следните денови очекуваат дека ќе ги обезбедат, пристап треба да им овозможи претставник на фирмата „Ериксон“, чиј што уред исто така е дел од системот за следење на комуникациите во УБК.
Специјалното јавно обвинителство во Управата за безбедност и контраразузнавање пред два дена влезе со судски налог во потрага по клучните докази кои ќе одговорат на прашањата кој и како прислушувал во Македонија и кој бил прислушуван. Специјалната обвинителка Катица Јанева од УБК побара преземање на документацијата за решенијата за посебни истражни мерки во периодот од 2008 до 2015 година и листинзи на телефонски броеви што биле следени од УБК во тој период.
СЈО отвори три истраги поврзани со следењето на комуникации. Првата е случајот Тврдина и се однесува на уништување на систем за прислушување. Во овој предмет осомничени се двајца началници од УБК, како и поранешната министерка за внатрешни работи Гордана Јанкулоска.
Вториот предмет е обвинението против седум лица за уништување и фалсификување на документација поврзана со неовластеното прислушување, а првообвинет е поранешниот началник на Петтата управа Горан Грујовски.
А, најновата пред истражна постапка е со цел да се утврди кој прислушувал и како. Токму затоа на СЈО му беа потребни книгите за евиденција и компјутерските податоци, бидејќи процедурите за ПИМ мерките го кријат клучот за злоупотребата на опремата за прислушување во Управата за разузнавање и контраразузнавање.