Десетици жени, филмски ѕвезди одржаа протест на филмскиот фестивал во Кан против дискриминацијата врз основа на полот во филмската индустрија.

Кејт Бланшет, Кристен Стјуарт и Џејн Фонда беа меѓу демонстрантките на црвениот тепих.

Престижниот фестивал во Кан беше критикуван поради тоа што не успеа да прикаже повеќе филмови од жени – режисери.

Ова е прв фестивал во Кан, по наводите за сексуална злоупотреба против продуцентот Харви Вајнстин  минатата година.

“Тука се 82 жени, кои го претставуваат бројот на женски режисери кои се искачија по овие скали уште од првото издание на Канскиот филмски фестивал во 1946 година. Во истиот период, 1.688 машки режисери се качија на овие исти скали”, рече двократната добитничка на Оскар Кејт Бланшет и додаде дека престижната награда „Златна Палма“ досега била доделена на 71 маж – режисер и само на две жени – режисерки.

На протестот учествуваа сите жени – членови на  жирито на фестивалот и многу актерки, режисерки и продуцентки. Продуцентката и активистка Мелиса Силверстејн  рече дека протестот е “голем чекор кон промени”.

На доделувањето на „Златен глобус“ во јануари, многу филмски ѕвезди носеа црни наметки или фустани за поддршка на движењето „Времето истече“ -иницијатива зад која застанаа  300 актерки, писателки и режисерки, солидарно со жртвите на сексуален напад и малтретирање.