Македонска победа по германски рецепт. Ракометарите на Вардар, среде Франкфурт, го совладаа Рајн Некар Левен со 33:27 во седмото коло во Лигата на шампиони и го одбранија првото место на табелата во групата Б. „Експлодираше“ Хуан Кањелас кој го „исрешета“ германскиот првак со 10 гола, Циндриќ постигна седум колку што реализира и Сигурдсон за поразената екипа. Во наредното коло „црвено-црните“ ќе бидат домаќини на клубот на Манасков кој остана без минутажа вечерва.
Вардарци одиграа типично германски во „Фрапорт арена“. Од почеток наметнаа висок ритам на игра што ривалот го следеше во првото полувреме, но не успеа да одржи чекор и во второто. Составот на Раул Гонзалез ги реши во своја полза воведните 30 минути со „тесни“ 17:16, додаде гас во продолжение на средбата и на десетина минути до крајот ги отстрани сите дилеми околу двата бода. Се чини дека добро беше анализиран противникот, а тактиката што се одбра донесе и резултат. Средниот бек Шмид и кружниот напаѓач Баена беа издвои како најопасни противнички фигури пред натпреварот. Првиот беше целосно неутрализиран и остана без погодок од трите закани што ги упати, вториот беше солидно затворен и не му беше дозволено да се разигра и покрај четири гола што ги запиша.
Цврсти во одбрана, немилосрдни во напад беа играчите на македонскиот шампион вечерва во Германија. Особено во второто полувреме во кое играчки не паднаа ниту резултатски се задоволија и опуштија и при водство од осум гола разлика. Меѓу стативите го имаа Арпад Штербик кој забележа 13 интервенции, а Кањелас, во нападот, беше „џелат“ за Рајн Некар. Шпанецот дојде до полн израз и шутираше со 77 отсто успешност (10/13). Најголемата поддршка ја имаше во хрватскиот репрезентативец Циндриќ, но добра вечер во двата правца на игра и од Македа кој реализира четири гола. Дибиров и Стоилов додадоа по три во шестиот триумф на вардарци во ЛШ сезоната, четври против Рајн Некар Левен во петтиот директен судир и втор на теренот на германската екипа.
Рајн Некар Левен – Вардар 27:33 (16:17)
Сала: „Фрапорт арена“ во Франкфурт. Гледачи: 5.000. Судии: Зигмарс Сондорс и Ренарс Личис од Летонија.
Рајн Некар Левен: Апелгрен, Бауер, Шмид, Сигурдсон 7, Манасков, Баена 4, Стеинхаузер, Ларсен 1, Пекелер 1, Грецки 3, Абт, Реинкајнд 1, Вилјаплана 1, Петерсон 6, Екдал 3. Тренер: Николај Јакобсен.
Седмерци: 2/4. Исклучувања: 2 минути
Вардар: Штербик (13 одбрани), Милиќ, Стоилов 3, Фереира Мораеш, Македа 4, Деревен, Карачиќ, Душебаев 2, Абутовиќ 1, Кањелас 10, Циндриќ 7, Чупиќ 2, Дибиров 3, Шишкарев, Борозан, Марсениќ 1. Тренер: Раул Гонзалез.
Седмерци: – Исклучувања: 4 минути