Никола Карабатиќ се најде на насловните сттраници на светските медиуми по вторпат во само три четири дена. Во неделата со Франција ја освои титулата на Светското ракометно првенство, а денеска во Монпелје е осуден на условна казна затвор во траење од два месеца. Ова е епилог на долгиот судски процес за големиот обложувачки скандал што изби во земјата домаќин на неодамнешниот мундијал во кој е вмешан и неговиот брат Лука и 14 други лица.
Карабатиќ ќе мора да плати и 10.000 евра, откако беше прогласен за виновен за местење на резултатот и обложување на истиот.
Спорниот натпревар се одигра во 2012 година кога браќата Карабатиќ настапуваа за Монпелје. Со клубот ја осигураа титулата во францускиот шампионат што овозможуваше нешто покомотни настапи во финишот на сезоната. Во еден таков беа домаќини на Сесон-Рен, екипа што се бореше за опстанок во лигата, и замина од Монпелје со сензационален триумф со 31:28, краен исход што беше со квота 45.
Подоцна беше откриено дека браќата Карабатиќ и други 14 лица се обложиле на пораз на фаворитот што им донел заработувачка од околу 300.000 евра. Најтешко минаа Никола Жиле кој е казнет со четири месеци затвор и 40.000 евра и Србинот Младен Боиновиќ со четири месеци зад решетки и 20.000 евра како организатори на целата афера.
Никола Карабатиќ пред судот во Монпелје негираше дека учествувал во измамата велејќи дека тогашна партнерка се обложила и дека без негово знаење симнала апликација за обложување на лаптоп што она и го потврди исказот. Лука Карабатиќ, пак, призна дека се обложил со својата девојка и правдаше дека тоа било „глупост на млад ракометар“.