Коалицијата на централно ниво е стабилна, генерално сме задоволни од европската ориентација на Владата, но, и покрај тоа што не сме задоволни од постапки на некои државни функционери на ДУИ, очекувам гласови од СДСМ во вториот круг на локалните избори, најави лидерот на БЕСА, Билал Касами во вечерашното гостување на ТВ Телма.
Касами за ривал во трката за градоначалничката фотелја во Тетово ја има Теута Арифи, меѓутоа изрази надеж за фер игра од коалициските партнери на 31 октомври.
Се наоѓаме среде два круга на локални избори на кои се нудат кадри и програми за локални теми. Но, еве, ќе бидам искрен и ќе кажам оти очекувам поддршка од електоратот на СДСМ со кој имаме предизборна коалиција, како што беше случај и на вонредните парламентарни избори лани на кои бев носител на пратеничка листа во шестата изборна единица, порача Касами.
Лидерот на БЕСА, како што нагласи, чувствувал позитивни вибрации од членови на Алијансата на Албанците, но и од сите тетовци кои, според него, сакаат промени во градот под Шара.
„Најголем проблем за Општина Тетово се финансиите. Арифи ја презеде функцијата со долг, но и го одржа долгот. И уште пострашно е што овие пари се потрошени за плати и тековни трошоци, за купување на гласови, наместо за инфраструктурни проекти и капитални инвестиции“, вели Касами.
Сашко Ѓ. Димовски