Пјер Антонио Панцери, наводниот организатор на скандалот Катаргејт, се очекува да и даде на белгиската правда нови имиња на пратеници на ЕУ од Германија, Франција и Италија, изјави во понеделникот адвокатот на затворената грчка европратеничка Ева Каили.
„Доаѓаат пораки и вести дека тој ќе каже имиња на нови инволвирани пратеници во скандалот и тоа европратеници од Германија, Франција, Италија и Белгија“, изјави адвокатот Михалис Димитракопулос во интервју за ТВ каналот Контра.
Панцери се договори со белгиската правда да проговори и да ги опише деталите за скандалот во замена за поблага казна. Панцери денес ќе сведочи за прв пат откако склучи договор со белгиските власти.
Но, за Димитракопулос, Панцери направи потег од висок ризик. „Му рекоа дека ќе остане во затвор една година, но ќе им ги даде имињата што ги сакаат“, рече тој, навестувајќи дека Панцери е политички изманипулиран.
„Сега тој е целосно недоверлив и единствено што се грижи е да ги спаси сопругата и ќерката, а што и да му дадат, тој ќе потпише“, додаде грчкиот адвокат.
Димитракопулос, исто така, рекол и дека договорот што Панцери го направил со белгиските власти ќе „пропадне“ во одреден момент бидејќи „ќе има силни реакции од луѓето што Панцери ќе ги обвини“.
Тој рече дека двајца белгиски европратеници веќе се против него и од нив се очекува да откријат работи против Панцери, што тој самиот досега ги криеше. „Значи, договорот ќе пропадне во овој случај“, рече тој.
Извор близок до случајот изјави за EURACTIV дека според договорот, Панцери мора да им ја каже целата вистина на белгиските правосудни органи и да не крие ништо. Ако не го стори тоа, тој не само што „го прекршува договорот“, туку и ќе биде обвинет за „попречување на правдата“.
Извор: Еуроактив