Специјалното јавно обвинителство денеска од Основното јавно обвинителство за гонење на организиран криминал и корупција, го побара предметот против Зоран Божиновски, кој неодамна беше екстрадиран од Србија.
Во тој предмет новинарот Божиновски е обвинет како дел од случајот „Шпион“ за кој веќе СЈО има воспоставено надлежност.
Божиновски е во притвор од 22 април, откако претходно како осомничен во случајот „Шпион“, по меѓународна потерница издадена на 19 ноември 2013 година, беше уапсен во Нови Сад, Србија.
Божиновски е осомничен во случајот „Шпион“, но постапката за него беше раздвоена поради тоа што им беше недостапен на органите на прогон. Тој се товари дека ги сторил делата: злосторничко здружување од чл. 394 ст. 2, шпионажа од чл. 316 ст. 3 в.в со чл. 45 од КЗ и кривично дело уцена од чл. 259 ст. 2 в.в ст. 1 в.в со чл. 19 д КЗ.
Новинарот беше уапсен во Нови Сад, Србија, и во 2013 година, но тамошниот суд ја усвои неговата жалба, по што тој го напушти екстрадициониот притвор каде што помина 11 месеци, со обврска да се јавува во тамошната полициска станица на секои 15 дена. Како гаранција дека нема да ја напушти земјата, му беше одземена и патната исправа.