Договорот од Преспа е чесен компромис, ги задоволува националните интереси на двете страни и еднаш засекогаш го отстранува отровот на меѓусебно сомневање, вeли министерот за надворешни работи на Грција, Јоргос Катругалос во интервју за неделното издание на грчкиот весник „Етнос“. На прашањето дали до изборите, владата ќе успее да ги убеди сите оние кои ја критикуваат за придобивките од договорот, тој истакна дека „не се сомнева во тоа“.
„Полека, пополека се сфаќа значењето на договорот како чесен компромис што ја задоволува суштината на националните интереси на двете страни, отстранувајќи го еднаш засекогаш отровот на меѓусебното сомневање. И како што поминува времето, толку повеќе ќе бидат очигледни економските придобивки за земјата, а особено за нашата Македонија, од нашето протагонистичко преместување на економското поле на Балканот, вели шефот на грчката дипломатија.
Во однос на комисиите за учебниците и за трговските ознаки, министерот за надворешни работи на Грција објаснува дека првата е веќе формирана и „од септември ќе бидат пуштени нови учебници во Северна Македонија ослободени од секаков вид иредентизам“. Комисијата за ознаки ќе се формира до средината на мај со учество на претставници од надлежните министерства за надворешни работи, за економија и развој, за земјоделски развој, како и меѓународни експерти. За нејзино подготвување беа направени систематски консултации со бизнисмени и со коморите од Северна Грција, објаснува Катругалос во интервјуто за „Етнос“.