Бостон го доби и 14. натпревар во низа во НБА лигата. Пред налетите на селтикси падна и шампионот Голден Стејт со 92:88 со пресврт во третиот период што беше заокружен во последниот. Воведот во натпреварот им прпадна на вориорси кои првата четвртина ја решија во своја корист со 28:18, а двоцифрена предност одржуваа до 30. минута. По неа домашните заиграа цврсто во одбрана, го неутрализираа најдобриот напад во лигата, го анулираа минусот и на крајот заслужено се насладија со вреден скалп.
Најдобри поединци во победничката екипа беа Џејлен Браун со 22 коша, Ал Хорфорд уфрли 18, а Кајл Ирвинг 16. Прв стрелец во тимот на Голден Стејт беше Кевин Дурент со 24 поени додека Стеф Кари беше запрен на само девет.
Тековната победничка серија на Бостон е втора најдобра во клупската историја. Рекордот на најтрофејната франшиза во најсилната кошаркарска лига во светот изнесува 19 меча без пораз.
Во вториот натпревар ноќеска Хјустон, како гостин, го совлада Феникс со 142:116. Најефикасен во составот од Тексас беше Џејмс Харден со 48 поени, лидер на „сонцата“ беше Дениелс со 23 коша.
НБА лига, резултати
Бостон – Голден Стејт 92:88
Феникс – Хјустон 116:142