Динамо Загреб ја совлада Бенфика со 1:0 во првиот меч во осминафиналето во Лига Европа, но без услугите на капитенот Аријан Адеми. Македонскиот репрезентативец не беше во протоколот поради повреда на стомачниот ѕид што ја влече подолг период.
И со непријатната повреда, тој одигра многу мечеви во оваа сезона. Меѓутоа лекарскиот тим на „модрите“ процени дека нема смисла за натамошен ризик за влошување на состојбата и одлучи дека хируршкиот зафат е неопходен.
Адеми отпатува во клиника во Минхен каде во текот на денешниот ден ќе биде подложен на операција. Тамошните специјалисти важат за најдобри за проблемот што го мачи дефанзивниот играч за врска на Динамо Загреб и на македонската репрезентација, интервенција е рутинска и рехабилитацијата до враќање на терен се предвидува да трае околу три недели.
Адеми, покрај обврските на Динамо Загреб во хрватскиот шампионат и реваншот со Бенфика, ќе биде отсутен и во мечевите на националниот тим со Летонија (21 март) во Скопје и со Словенија на 24 март во Љубљана во квалификациите за Европското првенство во 2020 година.