Војници на КФОР пред еден час се појавија во близина на административниот премин Јариње каде осум дена се стационирани припадници на специјалните полициски единици на Косово, пишува порталот „Косово онлајн“.

Како што наведува медиумот, во прашање се американски, канадски и полски војници во рамки на мисијата на КФОР на Косово. Од КФОР за „Косово онлајн“ порачуваат дека „внимателно ја следат ситуацијата во цело Косово и дека го зголемиле бројот и времетраењето на рутинските патроли ширум земјата“.

КФОР внимателно ја следи состојбата во цело Косово и останува фокусиран на секојдневна примена на својот мандат кој е произлезен од Резолуцијата 1244 на Советот за безбедност на Обединетите Нации од 1999 година, со цел да се обезбеди безбедно и заштитено опкружување и слобода на движење за сите заедници кои живеат на Косово. КФОР го зголеми бројот и траењето на рутинските патроли ширум Косово, вклуќувајќи и северно Косово, наведоа од КФОР за „Косово онлајн“.

Претпладнево на Јариње стигнаа четири оклопни возила на Војската на Србија кои се оддалечени на два километра од административниот премин. Не е објавено од која единица се припадниците на Војската на Србија која има база во близина на Јариње.

Српската војска е во фаза на зголемена борбена готовност поради ситуацијата на северот на Косово, а реонот во изминатите три дена беше надлетуван од воени авиони и хеликоптери.