Русија извела ракетен напад врз гасна инфраструктура во регионот Одеса, со што, според украинскиот претседател Володимир Зеленски, се прави обид за поткопување на енергетската безбедност на Украина пред претстојната грејна сезона.
Мета на нападот била постројка во селото Новосилске, во близина на границата со Романија, каде што се наоѓа клучниот интерконектор „Орловка“. Преку оваа точка Украина добива гас по трансбалканската рута.
Ова беше намерен удар врз нашите подготовки за зимата – апсолутно циничен напад, какви што се сите руски удари врз енергетскиот сектор, порача Зеленски преку социјалната мрежа Телеграм.
Во текот на 2025 година, Украина веќе се соочи со сериозен пад во домашното производство на гас поради серија руски воздушни напади. Иако Москва негира дека напаѓа цивилна инфраструктура, енергетските постројки ги смета за легитимни воени цели поради нивната поддршка за украинската воена индустрија.
Гувернерот на Одескиот регион потврди дека е нападната клучна гасна инфраструктура и информираше дека надлежните работат на испумпување гас од засегнатиот гасовод. Засега не е познато дали интерконекторот е трајно оштетен и дали гасот ќе продолжи да тече непречено.