Три лица се убиени, а десет, меѓу кои и три деца, се ранети во руските напади во Украина во текот на изминатите 24 часа, изјави началникот на регионалната воена администрација на Харков, Олег Синегубов.
Тој рече дека шест села во регионот Харков биле нападнати. Во селото Лиман, општина Вовчанск, биле убиени жена на неодредена возраст и 49-годишен маж.
Синегубов додаде дека утрово, руските сили го нападнале и градот Лозова со 33 дронови. Во нападот бил убиен 55-годишен маж, а 10 лица биле ранети, меѓу кои 13-годишно девојче и 14-годишно момче.
Државниот железнички оператор изјави дека е нанесена штета на станицата и другите објекти во Лозова, транспортен центар во регионот Харков што се граничи со Русија.
Шефот на градскиот совет, Сергеј Зеленски, напиша на Телеграм дека тоа е најмасовниот напад врз градот од почетокот на војната. Тој рече дека снабдувањето со вода е прекинато во некои делови од градот.
Украинскиот претседател Володимир Зеленски, исто така, го коментираше нападот.
Синоќа Русите лансираа балистичка ракета и речиси 50 дронови, од кои повеќето се руско-ирански Шахеди, против Украина. Многу од дроновите беа соборени од нашите бранители, но за жал имаше и удари, напиша тој на социјалната мрежа „Х“. „Екипите на Државната служба за вонредни ситуации работеа цела ноќ во Лозова, регионот Харков. Тука Русите погодија цивилна инфраструктура со повеќе од 25 ракети „Шахед““, додаде Зеленски.