Траги на Ковид-19 се пронајдени во пилешко месо увезено од Бразил при рутинска контрола на кинеските власти. Вирусот во вторникот е детектиран во примероци на замрзнати пилешки крилца, соопштија локалните власти во јужниот кинески град Шенжен во близина на Хонг Конг.

По откривање на вирусот веднаш се тестирани лицата кои биле во контакт со контаминираните производи и нивните блиски. Локалните власти истакнаа дека тестовите на сите биле негативни. Бразил е најголем светски произвоидител на пилешко месо, но и втора земја, по САД, што е најпогодена од пандемијата.

Кина, каде првпат се појави Ковид-19 кон крајот на 2019 година, во голема мера ја искорени епидемијата, според официјално објавените податоци. Кинеските власти денеска објавија дека има 19 новозаразени, а последниот смртен случај е регистриран на средината од мај.

Властите во градот Вуху, источна Кина, вчера соопштија дека во амбалажа на замрзнати морски ракчиња од Еквадор бил откриен новиот коронавирус. И во други неколку кинески градови биле откриени контаминирани замрзнати морски ракчиња увезени од Еквадор, поради што е забранет увоз, а увезениот артикал бил запленет од сите ресторани во Вуху.