Дополнителниот заменик-министер за информатичко општество, Александар Кирацовски информира дека од повеќе институции во земјава добиле информации дека на вработените во истите им се врши притисок од страна на раководителите да се најдат пред Државната Изборна Комисија и да протестираат со цел да извршат притисок врз работата и носењето на одлуки.

– Сакаме да ја информираме јавноста дека извршување на партиски и изборни активности во текот на  работното време во јавниот сектор е спротивно на член 38 од Законот за вработени во јавниот сектор, а вршењето на закана, оневозможување и спречување на утврдување или објавување на резултатите од гласањето е казниво согласно член 158 од Кривичниот законик. Ние нема да дозволиме кој било вработен во јавниот сектор да трпи притисоци и понижувања и да биде инструмент во рацете на режимските слуги во заминување, се вели во соопштението од Кабинетот на Кирацовски.

Тој информира дека поднеле иницијатива до Државниот инспекторат за труд, Државниот  управен инспекторат  и Министерството за внатрешни работи за вонреден надзор на работата на Општина Штип, УЈП – Регионална дирекција Штип како и РЕК Битола.