Јирген Клоп доби уште еден дуел со Жозе Мурињо. Овојпат на „Енфилд Роуд“. Ливерпул го совлада Манчестер јунајтед со 3:1 (полувреме 1:1) во дербито на 17. коло во Премиерлигата или ако сакате „дербито на Англија“ и го задржа врвот на табелата.
Германскиот менаџер го чуваше адутот за трите бода крај себе до 70. минута. Го уфрли во игра Џердан Шаќири и со него ги отклучи неколкуте брави што Португалецот ги беше поставил по израмнувачкиот погодок на Џеси Лингард во 33. минута. Само три минути по втрчување во терен, швајцарскиот репрезентативец погоди за 2:1 на „црвените“, а во 80. минута успеа по вторпат да го совлада Де Хеа за заверка на победата на домашните за кои првиот гол го постигна Мане во 24. минута.
Ливерпул со овој триумф само го надгради најдобриот старт во Премиерлигата во клупската историја и сè уште не знаат за пораз по 17 одиграни средби. Моментно се лидери во конкуренцијата со 45 бода, еден повеќе од Манчестер сити, додека Јунајтед заостанува дури 19 бода зад екипата од „Енфилд“. Ова воедно беше прва победа на „црвените“ над Манчестер Ј. од 2013 година како најнова потврда за сериозноста на нивните намери за напад на шампионската титула во оваа сезона.
Премиерлига, 17 коло
Ливерпул – Манчестер Јунајтед 3:1
Саутемптон – Арсенал 3:2
Брајтон – Челзи 1:2
Фулам – Вест Хем 0:2
Кристал Палас – Лестер 1:0
Хадерсфилд – Њукасл 0:1
Тотенхем – Барнли 1:0
Вотфорд – Кардиф 3:2
Вулверхемптон – Борнмут 2:0
Манчестер сити – Евертон 3:1
Табела: Ливерпул 45, Манчестер сити 44, Тотенхем 39, Челзи 37, Арсенал 34, Манчестер јунајтед 26, Вулверхемптон 25, Евертон 24, вест Хем 24, Вотфорд 24, Борнмут 23, Лестер 22, Брајтон 21, Њукасл 16, Кристал Палас 15, Кардиф 14, Саутемптон 12, Барнли 12, Хадерсфилд 10, Фулам 9.