Јирген Клоп е горд на своите фудбалери од начинот на кои ја совладаа Рома во првиот меч од полуфиналето во Лигата на шампиони. Германскиот менаџер на „црвените“ со пофални зборови за Мохамед Салах, за неговиот ефект против „волчицата“ и за фантастичната форма во која игра.
„Салах игра извонредно во оваа сезона. Во одлична форма е, одличен фудбалер е. Среќен сум поради него, но мора долгорочно да ја одржи за да биде најдобар во светот. Првиот гол му беше генијален, вториот исто така брилијантен“, изјави Клоп по средбата на „Енфилд“.
Египетскиот репрезентативец постигна два гола и асистираше уште за два во триумфот над Рома со 5:2 за трасирање на Ливерпул кон финале во ЛШ.
„Првиот меч покажа зошто можеме да ги победиме и во реваншот во Рим иако очекувам сосема поинаков натпревар. Рома е таа што ќе мора да нападне, но неколку пати досега реков дека Ливерпул не е Барселона бидејќи постојат само неколку клубови во светот што освоиле се што може да се освои“, нагласува тренерот на Ливерпул.
„Црвените“ ќе патуваат на реванш со Рома со залиха од три гола. По два од петте за нив постигнаа Салах и Фирмињо, еден беше дело на Мане додека стрелци за римјаните беа Џеко и Пероти од пенал.