Јирген Клоп е свесен дека би можел да ја доживее судбината на Клаудио Раниери во Лестер ако изостанат резултатите со Ливерпул. Германскиот фудбалски менаџер досега никогаш не останал без работа, но прифаќа дека е можно такво нешто во случај на незадоволство.
„Потсетување на менаџерите за нивната работа во светот на фудбалот е непотребно. Ако не можеме да сториме ништо или бидеме далеку од големи цели во наредните години, нештата може да се искомпликуваат. Досега не го разбирав тоа бидејќи секогаш имав долгорочни договори и останував во екипите колку што сакав. Ливерпул е клуб што има силни врски со менаџери, но, сепак, се зависи од успехот“, истакна Клоп.
Ваквата негова порака доаѓа по само неколку дена од отказот што Лестер го врачи на Клаудио Раниери иако во минатата сезона ги предводеше „лисиците“ до сензационално освојување на шампионската титула во Премиерлигата. Клоп потсети и на примерот со Жозе Мурињо во Челзи кој беше отпуштен по само неколку месеци од освоениот трофеј.
„Гвардиола досега не бил отпуштен како и јас, но ние сме само малку примери. Погледнете, Челзи ја освои титулата, а потоа го отпушти менаџерот. Тоа е дел од нашата работа за што мора да бидеме свесни и да го прифатиме. Но, и да работиме и да се надеваме дека до тоа нема да дојде“, заклучи Германецот на кормилото на „црвените“ од „Енфилд“.