По најавата од претседателот на ВМРО-ДПМНЕ, Христијан Мицкоски, дека наскоро е можно да се комплетира пратеничката група и да се вратат во Собранието, правните експерти нудат две опции кои се можни за да се оствари ваквото сценарио.
Судот, кога ќе одлучува по жалбите на пратениците, да донесе одлука тие да се бранат од слобода, со одредување на мерки за присуство или одземање на пасошите. Ваквата одлука, ќе значи и присуство на пратениците во Собранието. И втората варијанта е судот да им одреди куќен притвор, но во ваков случај тие не би можеле да се вратат во работата на Парламентот, анализира Петар Арсовски.
Според Арсовски, одлуката на судот за пратениците да се бранат во слобода е помалку веројатна, поради тежината на делото кое им се става на товар. Тој очекува судот да донесе одлука за замена на притворот со куќен.
Претседателот на ВМРО-ДПМНЕ Мицкоски по средбата со Заев изјави дека се надева дека наскоро ќе се вратат во Собранието.
,,Во моментов, ВМРО ДПМНЕ останува на своите позиции, прашањето е од математичка и политичка природа и ние не можеме да бидеме комплетно активни во Собранието. Се надевам и имам чувство дека многу брзо математичките и политичките проблеми ќе бидат надминати и ВМРО-ДПМНЕ ќе може да се врати во Собранието и да биде целосно посветена на работата во парламентот, рече Мицковски по средбата со премиерот Заев.
Премиерот Заев вели дека нема намера да врши притисок врз обвинителството за ослободување на притворените пратеници за инцидентите од 27 ми април.
,,Ја разбирам позицијата на ВМРО-ДПМНЕ да не се враќа во Собранието сѐ додека не бидат комплетни, но нашата позиција исто така останува непроменета – немаме намера да влијаеме на правосудството и на одлуките на судот во однос на приведените пратеници. Тоа е недозволиво, законот важи за сите. Но, ќе кажам дека притворот не смее да биде казна. Сепак, тоа е обврска и право на обвинителството и судовите во Македонија“ рече Заев.
Неофицијално, извори во ВМРО-ДПМНЕ велат дека услов за враќање во Парламентот останува комплетирањето на пратеничката група, а тоа значи присуство на сите пратеници во Собранието.
Шест пратеници на ВМРО-ДПМНЕ се осомничени од Основното јавно обвинителство за терористичко загрозување на уставниот поредок и безбедноста во врска со настаните од 27 април годинава.
Во моментов во затворски притвор се пратениците Крсто Мукоски и Сашо Василевски. Останатите четворица пратеници – Жаклина Пешевска, Љубен Арнаудов, Јохан Тарчуловски и пратеникот на Социјалистичката партија, Љупчо Димовски се во куќен притвор.
Апелација, одлучувајќи по жалбите на притворените, пред десетина дена им го замени затворскиот притвор со куќен на Богдан Илиевски, Борис Дамовски и пратеникот Љубен Арнаудов, Јане Ченто, Иван Цветановски – вработениот во кабинетот на поранешниот претседател на Собранието, Трајко Велјановски и Оливер Радулов од УБК. Истовремено, Апелација го потврди притворот за Мукоски и Василевски.
По ваквите одлуки од Апелација, според извори на НОВА, дел од адвокатите на осомничените поднесоа и жалба до Врховниот суд со која бараат да се преиначи одлуката на Апелација, односно да се укине мерката притвор и да се замени со мерки на претпазливост.
Јавната седница на Врховниот суд, како што бараат адвокатите се уште не е закажана. Од Врховниот суд за НОВА велат дека до овој момент, до нив сеуште не се пристигнати жалби и објаснуваат дека процедурата оди преку Апелацискиот суд, од каде потоа жалбите се доставуваат до Врховен.
ВМРО-ДПМНЕ го бојкотира Парламентот од почетокот на декември, кога пратениците и уште 30 лица беа осомничени за настаните од 27 ми април.