Со часови не функционираат социјалните мрежи на „Фејсбук“, „Месинџер“, „Инстаграм“ и „ВатсАп“. Сопственикот на овие платформи, „Фејсбук“, преку социјалната мрежа „Твитер“ призна дека корисниците на социјалните мрежи имаат проблем до нивни пристап, но не ги кажа причините за тоа.
– Свесни сме дека некои луѓе имаат проблеми со пристапот до нашите апликации и производи. Работиме за да ги вратиме работите во нормала што е можно побрзо и се извинуваме за непријатностите, објави „Фејсбук“ на социјалната мрежа „Твитер“.
Светските новински агенции ги анализираат причините на најдолгиот прекин во достапноста на услугите на овие социјални мрежи. Причината ја гледаат во евентуална саботажа или пак системска грешка.
– Експертите за безбедност што ја следат ситуацијата велат дека прекинот може да биде предизвикан од грешка во конфигурацијата, што може да биде резултат на внатрешна грешка, иако теоретски е можна саботажа од инсајдер, пишува „Ројтерс“, каде се наведува дека хакирањето е помалку веројатно, бидејќи масивен хакерски напад кој ќе успее да ја совлада оваа социјална платформа бара моќна технологија.
Иако „Фејсбук“ дневно има речиси две милијарди активни корисници, на попладневното тргување акциите на компанијата „Фесбук“ се намалија за повеќе од 5%. Ова е најлош ден за компанијата изминатата година.
Претходно, поранешна вработена во „Фејсбук“, Францес Хауген, на ТВ емисија кажа дека таа е „свиркачот“ кој испраќаше доверливи информации до медиумите дека компанијата давала приортет на профилот пред безбедноста на социјалните мрежи. Таа го обвини „Фејсбук“ дека ги засилувал своите алгоритми за откривање и блокирање на лажни вести само ако за тоа имало притисок од јавноста, а веднаш потоа, се враќал стариот слободен систем на ширење секакви информации во име на раст на мрежата.
Социјалните платформи на „Фејсбук“ прекинаа да функционираат околу 17 часот.