Никола Митревски – Кољо, еден од обвинетите за насилствата во Собранието на 27 април, од вчера се наоѓа во истражниот затвор Шутка, откако сам се пријавил во полициска станица „Кисела Вода“.
Митревски во обвинителниот акт што беше поднесен пред два дена од Обвинителството за гонење организиран криминал и корупција се споменуваше како еден од 34 обвинети за терористичко загрозување на уставниот поредок и за помагање на истото дело за кои постапката беше прекината, бидејќи беа недостаппни на органите на прогонот. Но како што најави портпаролката на Обвинителството Елизабета Недановска, по нивното пронаоѓање постапката против нив продолжува.
Во обвинението Митревски се споменува како врската преку која дошол телефонскиот повик од Виена, што се смета за знак за почеток на насилниот упад во Собранието, при што една од целите, како што е наведува во обвинението била и физичка ликвидација на премиерот Зоран Заев.
Тој е обвинет дека на 27 април во 14.30 часот добил телефонски повик да ја започне акцијата за упад во Собранието. Бил контактиран од лице од обезбедувањето на тогашниот лидер на ВМРО-ДПМНЕ, Никола Груевски со кого заедно биле во Виена, Австрија, објави порталот „Судство.мк“, повикувајќи се обвинението што Обвинителството за гонење на организиран криминал и корупција вчера го поднесе во Кривичниот суд против 30 лица.
ВМРО ДПМНЕ ги демантираше информациите дека наводно човек од обезбедувањето на Никола Груевски дал наредба за активности поврзани со настаните на 27 април.
„Тоа е комплетно неточно. Ниту има таква работа, ниту пак тоа го пишува во обвинителниот акт кој го има поднесено обвинителството. Против посоченото лице не е покренато некакво обвинение, што значи дека се работи за вешто спакувана лага со цел да се манипулира јавноста“ пишува во соопштението од ВМРО ДПМНЕ.
Чавков, Пешов, Лазаров, Ѓошевски и Поповски се вратија во Шутка
По поднесеното обвинение за настаните во Собранието на РМ на 27 април минатата година, петмина обвинети чии жалби за притворите во понеделникот беа уважени од Врховниот суд, повторно се најдоа во Истражниот затвор Скопје по барање на Основното јавно обвинителство за гонење на организиран криминал и корупција. Изречен им е 30-дневен притвор.
Во Истражниот затвор се вратени поранешниот министер за внатрешни работи Митко Чавков и поранешните полициски началници Душко Лазаров и Митко Пешов, како и двајцата собраниски обезбедувачи, Горан Ѓошевски и Оливер Поповски. Кривичниот совет на Одделението за организиран криминал и корупција при Основниот суд Скопје 1, по предлог на Основното јавно обвинителство за гонење на организиран криминал и корупција, им определи 30 дена притвор поради постоење на основано сомнение дека сториле кривично дело „терористичко загрозување на уставниот поредок и безбедноста“ од член 313 од КЗ.
Поранешниот претседател на Врховниот суд Дане Илиев за НОВА објаснува дека одлуката за враќање во притвор е законска, бидејќи Врховниот суд претходно ги ослободил од притвор што бил изречен во истраќна постапка, а сега се работи за притвор по поднесување обвинение.
Кривичниот суд го одби барањето на Обвинителството иста мерка да им се изрече и на пратениците Крсто Муковски и Сашо Василевски. Судот им ја продолжи мерката куќен притвор. На пратениците Љупчо Димовски, Јохан Тарчуловски, како и на Игор Дурловски и Елизабета Доцевска Божиновска и им се продолжени мерките за претпазливост определени со решение на Врховен суд.
Врската со Грујевски и Бошковски
Но ова не е единственото дело за кое се сомничи Митревски. Заедно со Александар Василевски – Нинџа, кој исто така во јавноста е познат како сторител на кривични дела и кој исто така се бара како обвинет за настаните од 27 април, се обвинети дека биле логистика во обидот за бегство на разузнавачите Горан Грујевски и Никола Бошковски.
Нинџа и понатаму е во бегство, но според полициските извори и тој е во Македонија, дознава НоваТВ.
Нинџа и Кољо во октомври минатата година, требало од Бугарија да стигнат во Унгарија, преку Србија за да ги пречекаат Грујевски и Бошковски, по слетувањето во Будимпешта. Планот им пропаднал, откако српската гранична полиција им забрани влез во државата еден ден пред Грујевски и Бошковски да бидат уапсени во Грција.
ТВ 24 во октомври минатата година, објави информација дека Василевски и Митревски при обид да влезат во Србија, биле вратени од граничниот премин, а можната причина според познавачите е потегот на Србија да се дистанцира и да не се инволвира во случувањата во Македонија.
Откако ова беше објавено од ТВ24, Никола Митревски Коља испратил демант во кој се оградува од обвинувањата кон него.
– Во мое лично име, сакам да демантирам дека требало на некого да помогнеме и да пречекаме или пак логистика да бидеме за било кој. Точно е дека сме застанати на српска граница заради тоа што на трето лице му била пред истекување важноста на пасошот. Исто така сакам да демантирам дека се наоѓам во Бугарија. Моментално сум дома со семејството. Ве молам да не ги пополнувате вестите со нашите имиња и настаните од Собрание, туку да се земе во предвид вистината и доказите за случувањата, напишал Кољo во демантот.