Македонската фудбалска репрезентација ја слави втората победа во квалификациите за СП 2018 во Русија. Освежениот национален тим го совлада Израел со 1:0 и драстично ја подобри атмосферата пред дуелот со Албанија во вторник во Струмица. Стрелец на единствениот гол вечерва на „Сами Офер“ стадионот во Хаифа беше Горан Пандев во 73 минута што за капитенот беше прв во квалификации за ЕП или СП од 2006 година и доволен за прв триумф над Израелците по досегашните четири порази.
https://www.youtube.com/watch?v=0Q_nxIk2bQQ
Новата физиономија на националниот фудбалски тим го положи испитот во Израел. Јазолот на младост и искуство што го врза селекторот Игор Ангеловски не попушти во ниту еден момент во премиерниот настап, седми во циклусот, успеа да погоди, но и да му помогне на Столе Димитриевски да сочува мирна мрежа и покажа дека сме на добар пат да очекува порозова иднина за разлика од сивото минато.
Македонија можеше да замине со предност од 1:0 и на големиот одмор. Кире Ристевски го претвори нафрлувањето на Алиоски од левата страна, но рускиот арбитар Есков, по сугестија на асистентот, ја поништи радоста и ги раздели од прегратка стоперот на унгарски Вашаш и напаѓачите на Палермо и на Џенова, Илија Несторовски и Горан Пандев. Втората прилика за водство дојде по несмасната интервенција на Бен Хаим кој за малку ќе постигнеше автогол, но стативата беше негов сојузник, но и на голманот Глазер.
Израелците го имаа посед врз топка (65 отсто наспроти 35 отсто) меѓутоа македонските фудбалери беа рамноправни во останатите статистички елементи. Упатија седум удари кон противничкиот гол, колку и домашните кон Димитриевски и изведоа еден корнер повеќе од составот на селекторот Елиша Леви чија позиција е сериозно разнишана по вечерашната нула пред своите навивачи.
Решавачкиот момент дојде во 73 минута. Елмас, кој летово направи трансфер од Работнички во Фенербахче, по десет минути од влегувањето во игра го „вработи“ Пандев кој со силен удар фо „проби“ Глазер. Тешко стекнатото водство Македонија знаеше како да го сочува за на крајот да биде наградена со аплаузи од домашната публика која, пак, ги „поздрави“ своите репрезентативци и стручен штаб со свирежи за играта и поразот.
Израел – Македонија 0:1 (0:0)
Стадион: „Сами Офер“ во Хаифа. Гледачи: 20.000. Гл. судија: Алексеј Есков. Асистенти: Дмитри Мосјакин и Игор Демешко (сите тројца од Русија). Ж. картони: Барди, Елмас (Македонија). Стрелец: Пандев 73′ за Македонија.
Израел (формација: 4-3-3): Глазер – Давиѕада, Цедек, Бен Хаим, Битон (Келтјенс 71′) – Коен, Охана (Хемед 46′), Каба – Бен Хаим (Ајнбиндер 53′), Меликсон, Захави. Селектор: Елиша Леви.
Македонија (формација: 4-4-1-1): Димитриевски – Ристевски, Велкоски, Мислиу, Ристовски – Алиоски, Барди (Зајков 90′), Спировски, Николов (Елмас 63′) – Пандев – Несторовски (Радески 86′). Селектор: Игор Ангеловски.
Квалификации за СП 2018
Група Д, 7 коло
Србија – Молдавија 3:0
Грузија – Република Ирска 1:1
Велс – Австрија 1:0
Табела: Србија 15, Република Ирска 13, Велс 11, Австрија 8, Грузија 4, Молдавија 2.
Идно коло (5 септември): Република Ирска – Србија, Молдавија – Велс, Австрија – Грузија.
Група Г, 7 коло
Албанија – Лихтенштајн 2:0
Израел – Македонија 0:1
Шпанија – Италија 3:0
Табела: Шпанија 19, Италија 16, Албанија 12, Израел 9, Македонија 6, Лихтенштајн 0.
Идно коло (5 септември): Македонија – Албанија, Лихтенштајн – Шпанија, Италија – Израел.
Група И, 7 коло
Финска – Исланд 1:0
Хрватска – Косово (прекин поради дожд)
Украина – Турција 2:0
Табела: Украина 14, Хрватска 13 (-1), Исланд 13, Турција 11, Финска 4, Косово 1 (-1).
Идно коло (5 септември): Исланд – Украина, Турција – Хрватска, Косово – Финска.