Притворот на Едмонд Темелко е политичка тортура и газење на човековите права. Тој има сериозна болест од која секој ден му е загрозен животот, вели Ивица Коневски од ВМРО-ДПМНЕ.
„Единствениот Македонец кој е градоначалник надвор од границите на државава, веќе два месеци се наоѓа во притвор. Против него беше покренат конструиран случај, а подоцна и беше приведуван незаконски, насилно со брутално кршење на законите пред очите на неговото семејство. Едмонд Темелко, кој важи за најголем борец за човековите права на Македонците во Албанија, остана трн во око на Зоран Заев и криминалната банда околу него, кои не можеа да се помират со фактот дека Темелко не е притворен“, рече Коневски.
Тој додава дека судот подлегнал на политичките притисоци на Зоран Заев и СЈО и му изрече мерка притвор на Едмонд Темелко.
„Едмонд Темелко има сериозна болест од која што секој ден му е загрозен животот. Едмонд Темелко сам не може ниту да стане од кревет. Заради болеста, Едмонд Темелко не може сам да се пресоблекува, ниту да ги извршува физиолошките потреби. Едмонд Темелко има проблеми со дишењето, со хранењето, и со движењето. Едмонд Темелко има проблеми со вртоглавици, со внатрешните органи и секојдневно се бори со неподносливи болки во мускулите и зглобовите. Едмонд Темелко нема соодветна здравствена нега бидејќи таа не може да му биде пружена во истражниот затвор во Шуто Оризари. Едмонд Темелко, секој ден успева да го преживее благодарение на помошта што ја добива од друго притворено лице. Едмонд Темелко веќе два месеци, секојдневно се бори за сопствениот живот во нехумани услови затоа што Заев, СЈО и судовите под нивна контрола решиле да му се одмаздуваат“, обвини Коневски.