Повеќе од 40 конгресмени ја повикаа администрацијата на претседателот Доналд Трамп да воведе забрана за воени лидери од Мјанмар за влез во САД и да подготви конкретни санкции против лицата одговорни за прогонот на муслиманското малцинство Рохинги.
Во писмо до државниот секретар Рекс Тилерсон, група демократи и републиканци од Претставничкиот дом побараа да се преземат „значителни мерки“ против воените и други лица во Мјанмар кои ги прекршиле човековите права при нападите и протерале повеќе од половина милион Рохинги во странство.
Тилерсон, пак, пред вашингтонскиот Центар за стратешки и меѓународни студии, истакна дека САД ги сметаат за одговорни воените лидери во Мјанмар поради насилните прогони на муслиманите, но сепак не се осврна на прашањето за воведување можни санкции за прекршителите на човековите права во оваа азиска земја.
УНХЦР неодамна објави шокантно видео снимено со дрон долж границата на Мјанмар со Бангладеш, каде се гледа колона од илјадници бегалци како се обидуваат пеш да преминат во Бангладеш, преку тесен брег на надојдена река, бегајќи од насилствата што врз нив ги спроведуваат воените сили на Мјанмар. Во Бангладеш се сместени во пренатрупани кампови во кои владеат нехумани услови. Се проценува дека досега во Бангладеш пребегале повеќе од половина милион Ронинги.