Утринава пред пунктот на Црвениот крст во училиштето Наум Наумовски Борче во населбата „Ченто“ вриеше од волонтери. Ја собираа помошта за поплавените граѓани, редеа и пакуваа, а потоа ја сместуваа во транспортните возила. Целата работа ја координира генералниот секретар на Црвениот крст, Саит Саити. Кога НОВАТВ пристигна, со намера да направи репортажа, забележа дека пунктот е полн со новинари и сниматели, сите од провладините медиуми.
По 10 минути, директорот со дел од волонтерите застана пред влезот со извесна доза на свеченост – дојдоа важни гости. Придружувани од припадници (телохранители) на Министерството за внатрешни работи (МВР), како и членови на владиониот кабинет, во пунктот влезе лидерот на ВМРО ДПМНЕ, Никола Груевски, заедно со министерот за труд и социјална политика Диме Спасов, кој претходно надвор го чекаше премиерот за да влезат заедно додека ТВ екипите беа позиционирани внатре.
Груевски застана среде пакетите вода и храна и започна да ги испрашува генералниот секретар Саити и министерот Спасов. Тој бараше, тие даваа отчет. На моменти беше премиер, на моменти лидер на партија, а заликуваше и на координатор на Кризниот штаб. Шоуто заврши, камерите се спуштија, а со нив и микрофоните. Прашања немаше никој, освен НОВАТВ. Прашавме во која улога е тука, рече „како граѓанин“.
Не беше многу расположен да објасни дали тој лично ги координира сите активности на Кризниот штаб за поплавите и дали смета дека треба да се побара одговорност од институциите за толкав голем број на жртви.
Груевски забрзано го напушти пунктот и дури заборави и да се поздрави со генералниот секретар, па потоа се врати за да се ракува со Саити.
Првиот човек на Црвениот крст тврди дека тој не го пречекувал Груевски, туку лидерот се нашол во пунктот во исто време со него сосема случајно.
Саит Саити – генерален секретар на Црвениот крст на Македонија
НОВАТВ и други критички медиуми не добиваат никаква информација од власта, ниту од ВМРО-ДПМНЕ, за агендата на нивните функционери кои секојдневно одат во местата кои беа погодени од поплавата. При нивните посети нема новинарски прашања, туку главна улога има Груевски кој преку телефон ги координира сите министри и директори на институции.