Лидерот на Северна Кореја Ким Јонг Ун вели дека има „цврста волја за голем напредок“ и дека сака да напише „нова историја околу национално обединување“ со Јужна Кореја.
Ова тој и го порачал на делегацијата составена од високи јужнокорејски функционери кои го посетија Пјонгјанг, пренесуваат севернокорејските медиуми.
-Кога слушна за намерата на јужнокорејскиот претседател Мун Џае-ин во врска со самитот од специјален претставник на јужниот сосед, тој размени ставови и постигна задоволувачки договор, пренесуваат тамошните медиуми, не прецизирајќи за каков договор станува збор.
Севернокорејските агенции пренесуваат дека Ким издал важна инструкција до надлежните служби за тие „брзо да преземат практични чекори во тој правец“.
-Исто така тој размени темелни ставови околу прашања значајни за намалување на жестоките воени тензии на Корејскиот полустров и активирање на дијалог, контакт, соработка и размена меѓу двете страни, се вели во веста на севернокорејските агенции.
Севернокорејскиот лидер се сретна со јужнокорејските претставници вчера, а разговорите биле за меѓукорејски самит, што се смета за нов знак за одмрзнување на односите.
Дипломатите кои вчера беа во Пјонгјанг се највисоки јужнокорејски функционери кои дошле во Северна Кореја по повеќе од 10 години.
Сеул објави дека не е постигнат никаков договор за самит, кој би бил прв по 2007 година.
-Тоа не е договор, тоа се разговори, изјавил извор од јужнокорејската делегација, додавајќи дека двете страни на некаков начин размениле ставови и за други прашања.
Ким со јужнокорејската делегација разговорал 4 часа за време на вечерата во централата на Работничката партија во Пјонгјанг.
Од Јужна Кореја е истакнато дека детали за посетата ќе бидат објавени денеска по враќањето на делегацијата.
Јужнокорејската делегација утре би требало да патува за Вашингтон за да ги пренесе случувањата во Северна Кореја. САД имаат анмера да воведат нови унилатерлани санкции против Пјонгјанг, најстроги откако Доналд Трамп е во Белата куќа.
Северна Кореја соопшти дека е подготвена да разговара со САД без предуслови, но и дека нема да се откаже од нукеларното оружје, кое им е, како што тврди Пјонгјанг, одговор на американските закани.
Вашингтон, пак, како предуслов за разговори постави конкретни чекори за Пјонгјанг кон денуклеаризација.
Засега е нејасно дали на вчерашните разговори станало збор за денуклеаризација, но претставник на јужнокорејското претседателство изјавил дека верува дека се разговарало и за тоа.