Нови 60 позитивни тестови на корона-вирус се регистрирани на крузерот “Дајмонд Принцес“ што е закотвен во карантин во Јокохама, соопшти јапонското Министерство за здравство. Со нив, бројката на заболени на бродот се искачи на 130, јавија локалните медиуми повикувајќи се на извор од јапонското Министерство за здравство.
Крузерот е во двонеделен карантин во пристаништето Јокохама, откако кај еден патник што се симнал од бродот во Хонг Конг му бил дијагностициран вирусот.
На бродот има околу 3.700 патници и членови на екипаж, меѓу кои и тројва македонски државјани.
Од корона-вирусот починаa 910 лица, од кои 908 во Кина, заразени над 40.000
Кинеската национална здравствена комисија соопшти дека од вчера до денеска бројот на починати од епидемијата на коронавирус е зголемен на 910, од кои само во Кина починале 908. Со овие најнови податоци, наведува комисијата, жртвите на новиот тип на коронавирус ги надминаа оние од епидемијата на САРС, која во 2002-2003 година однесе 774 жртви. Вкупниот број на заразени со коронавирус во Кина надмина 40.000 лица, пренесоа француските медиуми.
Во Хубеи само во последните 24 часа се регистрирани 2.618 нови случаи на заразени со вирусот, со што вкупниот број на заразени во провинцијата достигна 29.631.
Поголем дел од новите смртни случаи се во градот Вухан, каде почна епидемијата на коронавирусот. Градските власти соопштија дека вчера во него починале 73 болни. Вкупниот број на смртни случаи во Вухан достигна 681.