Американскиот сенат и Белата куќа договорија пакет помош за националната економија во вредност од два билиона долари поради пандемијата на коронавирусот. Лидерот на републиканското мнозинство во Сенатот, Мич Мек Конел, наведе дека станува збор за инвестиција како во воено време.
Тоа воедно е најголема економска мерка за спасување во историјата на САД и замислена е како повеќенеделна или повеќемесечна „поддршка за економијата“ која се движи кон рецесија.
Веста за постигнатиот договор ја објави високиот советник во Белата куќа, Ерик Уленд, нешто по полноќ, кој додаде дека треба уште правно да се доработи. Преговорите од минатиот петок траеја секојдневно. Мек Конел се подготвуваше да објави оти е постигнат договор за предлогот, а деталите треба да бидат дополнително објавени.
Меѓутоа, во последните 24 часа, елементите на предлогот добија сѐ поголем фокус, со издвоени 250 милијарди долари за директно плаќање на поединци и на семејства, 350 милијарди долари заем за мали компании, 250 милијарди долари надокнада за осигурување од невработеност и 500 милијарди долари за заеми за проблеми на компаниите. Доколку мине во Когресот, пакетот би бил најзначајна законодавна мерка преземена за решавање на брзорастечката криза од коронавирусот.
Повеќе од 50.000 луѓе во САД во меѓувреме се заразени од новиот коронавирус. Регистрирани се над 660 смртни случаи од Ковид-19. Илјадници компании мораа да затворат. Милиони останаа без работа, а 100 милиони луѓе – речиси една третина од населението – мора да остане дома во изолација за да се забави ширењето на вирусот.
