Професорот Хендрик Штрек, раководител на Институтот за вирологија на Универзитетската клиника во Бон, открил нови симптоми на заразата со Ковид-19. Претпоставува дека тие се случуваат во напредната фаза од болеста.
Неколкудневно губење на чувството за мирис и за вкус е констатирано кај дел од пациентите во Германија кои биле заразени со новиот коронавирус, вели професорот Штрек, кој тестирал најголем број пациенти во Германија, но засега не може со точност да утврди кога се манифестираат тие симптоми.
„Претпоставуваме дека тоа се случува во напредната фаза од болеста“, вели Штрек во интервју за весникот „Франкфуртер алгемајне цајтунг“.
Кај 91 отсто од пациентите тестирани во Кина, симптомите биле благи и лесни, придружени со сува кашлица и евентуално треска. Дополнително, кај 30 отсто од германските пациенти е забележана и диареа, што е повисок процент одошто во Кина.
Вирологот објаснува дека една заразена мајка дури не можела да го почувствува мирисот на преполната пелена на нејзиното бебе, а кај други – храната им била целосно без вкус.
Ова се симптомите кои досега се сметаа за карактеристични за Ковид-19:
Новиот вирус е помалку опасен од САРС, но се реплицира уште во горниот дел на дишниот тракт што го прави многу позаразен. Карактеристика на САРС беше репликацијата длабоко во белите дробови, што го прави помалку заразен, но далеку поопасен.
Штрек објаснува дека во Италија биле тестирани само случаите со тешки симптоми – околу 9 отсто. Притоа, биле тестирани и веќе починати. Таму, според него, бројот на заразени е далеку повисок од прикажаните бројки. Во Германија, на пример, се тестираат и пациенти кои имаат благо гребење во грло, додека такво нешто во Италија не се прави.
И во Кина смртните случаи на почетокот брзо растеа во однос на бројот на заразените, бидејќи биле тестирани мртви. Притоа, повикувајќи се на студијата и од кинескиот Шенжен, Штрек заклучува дека децата се заразуваат од вирусот исто колку и возрасните, но тие развиваат само лесни, или дури и никакви симптоми.
