Борбата против корупцијата во светот речиси не напредува. Така е дури и во богатите индустриски земји во светот, покажува актуелниот индекс на корупција на „Транспаренси Интернешeнал“.
Македонија e на 106 место на листата на „Транспаренси Интернешнал“, односно на скалата од 0 до 100 поени (притоа 0 значи најголем степен на корупција, а 100 поени – најмалку корупција) има 35 поени. Тоа е за два поена помалку во споредба со минатата година (во 2018 година имаше 37 поени; во 2017 година – 35 поени; во 2016 – 37 поени).
Од земјите во регионот годинава подобри од Македонија се Босна и Херцеговина и Косово со 36 поени, Србија со 39 поени и Црна Гора со 45 поени, додека Албанија има еднаков ранг, односно 35 поени.
Генерално, извештајот на „Транспаренси Интернешнал“ покажува дека во голем дел од 180-те земји каде се правени истражувања, речиси нема напредок во борбата против корупцијата.
„Недостигот од вистински напредок е разочарувачки и има многу негативни последици за граѓаните ширум светот. За да се запре корупцијата и да се подобри животот на луѓето, мора да ги напаѓаме врските помеѓу политиката и високите финансии“, вели Патриција Мореира, раководителка на ТИ.
Јасни подобрувања нема дури ни во големите индустриски нации. Напротив, во четири од седумте држави на Г7 – Канада, Франција, Велика Британија и САД, ситуацијата е влошена. Германија и Јапонија се останати на исто ниво во споредба со 2018 година, а Италија е малку подобро рангирана.
На ранг-листата што организацијата „Транспаренси Интернешнал“ ја прави секоја година, овојпат најдобри се Данска и Нов Зеланд со по 87 поени, а потоа следува Финска со 86 и Сингапур, Шведска и Швајцарија со 85. Германија е на деветтото место и има 80 поени.
Она што е важно е дека ТИ ја мери перцепцијата на корупцијата во економијата, политиката и администрацијата, а бодовите за одделни земји се даваат врз основа на она што во испитувањата го кажуваат експерти и лица на раководни позиции. Најслаби резултати од вкупно 180-те земји имаат Сомалија, Јужен Судан, Сирија и Јемен.
„Во овие земји владее немир, насилство и војна. Тоа јасно ја покажува поврзаноста на корупцијата со нестабилноста“, вели за ДВ, Марва Фатафта, советничка на ТИ за Блиски Исток и Северна Африка.
Сепак, иако глобално погледнато речиси и нема напредок, луѓето протестираат против корупцијата и ги ставаат владите под притисок. „Прилично сум сигурна дека во иднина ќе има промени“, нагласува Фатафта и додава: „Протестите покажуваат дека луѓето не попуштаат во барањата на своите права.“