Тимот од Милано победи во Истанбул со 81:80, Реал М. во Тел Авив подобар од Макаби со 89:82, Олимпијакос го „разнесе“ Ефес во Пиреја со 90:66
Две победи на домашните екипи и сто толку на гостинските во воведните четири меча од второто коло во кошаркарската Евролига. Најголема драма понуди дуелот меѓу Дарушафака и Армани во Истанбул во кој тимот од Милано славеше со 81:80.
Најефикасен играч во составот на Јасмин Репеша беше Мачван со 19 поени, листата на стрелци меѓу поразените ја предводеше Морман со 20 коша. За Армани Милано ова е втора победа во сезоната, Дарушафака е со скор 1-1.
Со триумф од гости се враќа и Реал Мадрид. Кошаркарската секција на „кралскиот клуб“ го совлада Макаби во Тел Авив со 89:82.
Во Пиреја настрада Анадолу Ефес. Олимпијакос го „разнесе“ турскиот состав со 90:66, а победа пред своите навивачи забележа и германски Бросе Бамберг над Уникс Казан со 89:86.
Второто коло ќе се комплетира вечерва со преостанатите четири меча. Дербито е во „Блауграна“ каде Барселона го пречекува Фенербахче на нашиот Перо Антиќ, ЦСКА Москва е домаќин на Панатинаикос, Галатасарај на Црвена звезда и Жалгирис на Басконија.