Македонскиот кошаркарски шампион МЗТ Скопје Аеродром ќе влезе во новата сезона без градоначалникот на Аеродром, Ивица Коневски. Раководството на клубот од СЦ „Јане Сандански“ е известено за неговата одлука, но, според сознанија на Нова ТВ, општината ќе остане донатор на „штрковите“ и за наредната сезона. Финансиската конструкција за сезоната 2017/18 најавено е дека ќе биде испочитувана и средствата што се проектирани за потребите на нормално функционирање на екипата ќе бидат ставени на располагање.
Како една од причините за новонастанатана ситуација се наведуваат заладените односи меѓу Коневски и навивачката група „Фемили“ чија поддршка за кошаркарите во изминатиот период беше условена со ваков потег од првот човек на локалната самоуправа. Но, има и такви со политичка позадина. Добро упатени во општинските прилики го поврзуваат гестот на Коневски и со претстојните локални избори на кои, според нив, опозициската партија на централно ниво, ВМРО-ДПМНЕ, ќе исфрли друг кандидат за градоначалничката функција.
Општина Аеродром управува со МЗТ Скопје од 2012 година по законската обврска за трансформација на спортските клубови од здруженија на граѓани во акционерски друштва. Зделката беше комплетирана преку фирмата „Кошаркарски клуб МЗТ Скопје Аеродром АД Скопје“ и со основачки капитал од 25.000 евра презеде 75 отсто од хартиите од вредност додека 25 отсто задржа компанијата „Орка холдинг“ која во сезоните 2010/11 и 2011/12 беше доминантен финансиер на „штрковите“.
Екипата на МЗТ Скопје Аеродром во 2012 година ја освои првата шампионска титула во домашното првенство што од тогаш ја бранеше уште пет пати. „Металците“ во изминатите пет години освоија и четири трофеи во Купот на Македонија и се редовни учесници во регионалната АБА лига.