Хуан Карлос Наваро си обезбеди место во историјата на Евролига во уште една статистичка категорија. Членот на Барселона е првиот играч со, најмалку, 4.000 коша во елитното натпреварување. До новиот подвиг стигна во дуелот со Фенербахче во рамки на 30 коло од регуларниот дел на сезоната.
Фенербахче славеше со 68:65, по продолженија, а Наваро го заврши мечот со скромни четири поени, но доволни за пробивање на границата од 4.000. Тој е лидер и на вечната листа на најдобри шутери за тројка во Евролигата како и играч со најмногу настапи (319) во одбраното кошаркарско друштво.
Перо Антиќ одигра десет минути против Каталонците во Истанбул. Присуството на паркетот го заокружи со 3 поени (сите од линијата за слободни фрлања) и три скока (сите дефанзивни). Гостинскиот играч Тајрис Рис со 19 поени беше најефикасен на средбата, Виктор Клавер додаде 15 за составот од „Блауграна“ кој игра очајна сезона во елитната конкуренција.
Прв стрелец кај домашните беше Богдановиќ со 15 коша пред Калиниќ со 13 и Слукас со 10.
Евролига, 30 коло
Фенербахче – Барселона 68:65 (по продолженија)
Бамберг – Галатасарај 79:84
Макаби Тел Авив – Панатинаикос 61:81
Басконија – Жалгирис 79:84
Денеска (четврток) играат
ЦСКА – Олимпијакос (18 ч.)
Дарушафака – Црвена звезда (19 ч.)
Милано – Уникс Казан (20.45 ч.)
Реал Мадрид – Анадолу Ефес (21 ч.)