Задоволство од играта во одбрана, замерки за играта во напад истакна Јорданчо Давитков, селектор на кошаркарската репрезентација на Македонија, по триумфот над Португалија со 52:47 во воведниот настап на „Трофеј Македонија“. Гостите од Пиринеите имаа што да кажат во првата и во последната четвртина што ги добија 15:18, односно, 13:16. Средишните две, резултатски, минаа во знак на „црвено-жолтите“ (14:9, 10:4) и покрај многуте направени грешки и слабата реализација.
„Колку што имаше добри периоди во одбрана, толку имаше лоши во напад. Бевме агресивни во сопствениот рекет, но не успевавме да поентираме од отворени позиции, а ги имаве доста. Направивме и недозволиво голем број на грешки за вака сериозен натпревар. Ги имавме 12 само во првиот дел или вкупно 20 што е навистина многу. Нè очекува работа за нивно елиминирање и се надевам дека ќе имаме „мирна рака“ кога ќе биде најпотребно“, коментира Давитков по средбата кој даде поштеда за повредените Бојан Крстевски и Џордан Теодор.
Чековски беше најефикасен во националниот тим со 14 поени, во средбата на мал број кошеви двоцифрен беше и Стојановски (10). Кај Португалците Лима, Пинто и Гвереро уфрлија по осум.
Селекцијата на БиХ на чија клупа дебитира Душко Вујошевиќ, во првиот натпревар, ја порази Холандија со 102:96.
Турнирот во СЦ „Борис Трајковски“ продолжува денеска со дуели од второто коло. Португалија и БиХ ќе одмерат сили од 18 часот, во вечерниот термин (20,30 ч.) Македонија ќе игра против Холандија.